Suðurlandsbraut 48, 108 Reykjavík
Sími 588 4430, Fax 588 4431
netfang: samorka@samorka.is
 
 
 
 
 
 
 
 
 
 

  


Hitaveitur spara landsmönnum 112 milljarða á ári, í erlendum gjaldeyri 11.04.2014
Ef borið er saman við olíukyndingu spöruðu landsmenn alls um 2.300 milljarða króna (í erlendum gjaldeyri) á árunum 1914 - 2012, núvirt, með notkun jarðhita til húshitunar. Sparnaður ársins 2012 nam 112 milljörðum króna, yfir 6% af landsframleiðslu. Þetta má lesa í ársskýrslu Orkustofnunar fyrir árið 2013 (sjá bls. 13). Hreinna andrúmsloft er síðan mikilvægur bónus í þessu sambandi.
Ferilefnaprófanir ræddar á vorfundi Jarðhitafélagsins 30. apríl 08.04.2014

Vorfundur Jarðhitafélags Íslands verður haldinn miðvikudaginn 30. apríl kl. 14:00 í Orkugarði, Grensásvegi 9. Þema fundarins verða ferilefnaprófanir í jarðhitanýtingu. Sjá dagskrá fundarins á vef Jarðhitafélagsins.

Raforkukerfi í vanda 03.04.2014

„Staðan er því þannig að á meðan ekki er mörkuð skýr opinber stefna um jarðstrengi eða loftlínur og að óbreyttu skipulags- og leyfisferli mun flutningskerfi raforku áfram, og í vaxandi mæli, hamla þróun atvinnulífs og byggðar víða um land. Sem dæmi má nefna allan þorra Norður- og Austurlands.“ Þetta er meðal þess sem fram kemur í grein Gústafs Adolfs Skúlasonar, framkvæmdastjóra Samorku, í Fréttablaðinu. Hann segir til lítils að reisa nýjar virkjanir ef ekki sé hægt að flytja orkuna.

Lesa meira...
Niðurdæling brennisteinsvetnis að hefjast 02.04.2014

Á næstu dögum hefst niðurdæling brennisteinsvetnis, sem hreinsað hefur verið úr útblæstri Hellisheiðarvirkjunar. Tilraunarekstur hreinsistöðvar er hafinn. Við það breytist tilhögun niðurrennslis vinnsluvatns frá virkjuninni og getur það valdið hreyfingu á jarðlögum. Sjá nánar á vef Orkuveitu Reykjavíkur.

Jarðarstund og íslensk orka 28.03.2014

Laugardaginn 29. mars er svokölluð Jarðarstund (Earth Hour) skipulögð í þúsundum borga um heim allan. Um er að ræða öflugt framtak skipulagt af umhverfissamtökunum World Wildlife Fund og er tilgangur þess að minna fólk á stöðu loftslagsmála og hlýnun jarðar, m.a. með því að draga úr notkun raflýsingar. Losun gróðurhúsalofttegunda stafar öðru fremur af brennslu jarðefnaeldsneyta og víða um heim er raforka unnin með brennslu þeirra. Hér á landi eru dæmi um aðila sem hyggjast sýna þessu góða framtaki stuðning í verki. Ólíkt flestum öðrum ríkjum búum við Íslendingar hins vegar svo vel að hér er öll raforka (99,9%) framleidd með nýtingu vatnsafls eða jarðhita. Við Íslendingar getum því kveikt okkar ljós án nokkurra áhrifa á andrúmsloft jarðar, en við deilum þessu andrúmlofti með öllu mannkyninu og hljótum því að fagna þessu góða framtaki víða um heim.

Lesa meira...
Málþing VAFRÍ um vatns- og fráveitumál 25.03.2014

Vatns- og Fráveitufélag Íslands (VAFRÍ) stendur fyrir málþingi um nýjar rannsóknir og stefnur í vatns- og fráveitumálum þriðjudaginn 8. apríl frá kl. 15-16:30 í HT-101 í Háskólatorgi.

Lesa meira...
ESB-ríkin með 14% hlut endurnýjanlegrar orku, Ísland með 76% 24.03.2014

Hlutur endurnýjanlegra orkugjafa í endanlegri orkunotkun aðildarríkja ESB var að meðaltali 14,1% árið 2012, samkvæmt nýbirtum tölum evrópsku hagstofunnar Eurostat. Er þetta aukning um 8,3% frá árinu 2004. Hæsta hlutfall endurnýjanlegra orkugjafa í orkunotkun innan ESB er í Svíþjóð eða 51%, en næst kemur Lettland með 36%. Lægst er hlutfallið á Möltu, 1,4%, en næst koma Lúxemborg með 3,1% og Bretland með 4,2%. Öll eiga þessi þrjú ríki langt í langt að ná sínum markmiðum fyrir árið 2020. Til samanburðar má geta þess að á Íslandi er þetta hlutfall 76%. Hér eru 99,9% allrar raforku framleidd með endurnýjanlegum orkugjöfum sem og um 99% allrar orku til húshitunar, en við flytjum inn jarðefnaeldsneyti einkum til notkunar í samgöngum og sjávarútvegi.

Lesa meira...
Traustur rekstur og sterkari fjárhagur Orkuveitu Reykjavíkur 21.03.2014

Hagræðing í rekstri Orkuveitu Reykjavíkur og umfangsmiklar ráðstafanir, sem stjórn fyrirtækisins og eigendur þess (Reykjavíkurborg, Akraneskaupstaður og Borgarbyggð), samþykktu á árinu 2011 hafa skilað mun meiri og skjótari árangri en gert var ráð fyrir þá. Rekstrarhagnaður ársins 2013 var 17,2 milljarðar króna, skuldir lækkuðu um tæpa 40 milljarða og eigið fé jókst um rúma 20 milljarða króna á árinu. Frekari upplýsingar um ársreikning Orkuveitu Reykjavíkur árið 2013 má finna á heimasíðu Orkuveitunnar.